政壇：何俊賢闖後巷徒手通渠

食物及衞生局局長高永文上星期先話將於月內同全港各階層合作推出清潔運動，政府官員亦會親身參與。不過，一班立法會議員尋日就急不及待，全副裝備清潔後巷。各人乍見後巷衞生惡劣，亦難掩驚訝之情，小巷「嘩」聲此起彼落，漁農界議員「高佬賢」何俊賢就戴住手套表演「徒手通渠」，在場人士睇到目瞪口呆，但高佬賢就輕描淡寫話，每逢屋企廁所塞，佢都係用手搞掂，因為住家渠「大約都知入面塞咗咩」，所以多數一通就得，但尋日佢對「萬年淤塞」束手無策。