政壇：鬍鬚曾想外訪 網誌解畫鋪路

唔知係咪受「貪曾」外訪嘅寒蟬效應影響，財爺鬍鬚曾尋日喺網誌忽然告解，為證明外訪有例可依同必要性，連鄭和下西洋都攞出嚟講，話可見開拓海外貿易源遠流長，又話本港當前確有危機，因現時幾乎每星期都有外國政府高級官員嚟香港「撬客」，叫本港企業將基地搬離，面對周邊地區競爭，香港既要力保本港喺國際舞台上的角色，亦要多與外國政府同商界聯繫。一句講晒就係要多去外訪。

呻辛苦過留港

跟住佢話每次外訪都會爭取機會同當地嘅財金官員、商界領袖見面，仲話外訪其實好辛苦，但正所謂「唔辛苦，又點得世間財」，所以佢同同事會繼續為香港經濟發展努力，未來幾年嘅工作計劃將繼續集中於開拓東盟等新興市場，同時加強同泛珠三角區域城市嘅聯繫。佢又話市民平時只能從新聞報道了解訪問活動，但事實上，訪問前後都有嘢準備。佢仲話不時都有同事同佢講，其實外訪好辛苦，因為除咗每日行程安排得密密麻麻，一連串活動後仲要處理香港嘅工作，比留喺香港仲要忙。

講咁多為乜？原來係要為日後外訪鋪路，事關佢自爆已計劃喺預算案工作完成後，同本地工商界和專業界代表前往柬埔寨同緬甸考察，亦正安排訪問一啲珠三角地區嘅城市。

之後佢就自動波匯報過去外訪成果，例如過去五年佢重點外訪「金磚五國」，一一年到洛杉磯訪問，仲獲洛杉磯市長頒贈紀念證書添！不過，即使佢過往外訪成績咁輝煌，但又唔見得基層市民分享到經濟成果喎，外訪做得咁辛苦，真係難為咗佢喇﹗