離譜﹗快閃案一年七宗

【本報訊】涉及「快閃大盜」爆竊案件，去年至今最少發生七宗，連同昨日一宗在內，涉及名牌手袋店佔五宗。「米蘭站」主席姚君達形容事件十分離譜。

唯一店舖未換電閘

姚君達昨晚從瀋陽返港，他接受記者查詢時表示，知悉發生爆竊案，感到震驚，「我覺得好離譜，今時今日香港都發生呢啲事，十足葉繼歡年代咁，我覺得有關方面真係要關注吓」。他並透露該公司已非首次被爆竊，「其實好耐以前我哋都試過畀人爆竊，但自嗰次後，我哋所有店都更換晒電閘，冇可能入到嚟，唯獨今次呢間冇做到，因為店舖嘅玻璃櫥窗唔可以加電閘，結果就畀賊人有機可乘」，他不諱言會因應今次事件考慮搬舖。

本港過去發生過不少涉及名牌貨被竊案件，當中包括手袋、手錶、皮具、紅酒等等，由於內地有極龐大的吸納名牌貨巿場，故賊人多將贓物偷運到內地銷贓，甚至透過正常的銷售網絡出售，例如時下盛行的網上拍賣，以往曾經有名牌手袋，在內地的拍賣網站以優惠折扣價出售，被揭發是賊贓。