滾滾東江長嘥水 節約環保莫吹水

年年購買東江水，年年倒錢落大海。眨吓眼，東江水供港合約就快到期，港府最快年底同內地當局商談新合約，希望今次唔會再倒錢落大海啦！

港府係咁講嘅，今次會考慮提出按量收費，取代現時嘅定額收費，但擔心唔易達成共識喎。當局仲話，正研究海水化淡技術，最快七年後投入運作，相信短期內東江水供水量難以降低咁話。

知就好啦，東江水源源不絕越山來，如果新合約唔變，香港咪照舊年年倒錢落海？嗱，現時嘅供水協議真係相當戇居o架，所謂定額收費，即係定額浪費，香港明明唔需要咁多水，但就年年焗住要科水，而買多咗嘅水唔係浪費咗，就係流落大海，諗起都覺得折墮啦！

所以話，如果唔想繼續倒錢落海，或者倒水落海，唯一辦法就係修改合約，按量收費，用幾多，買幾多。港產官僚話唔易同內地達成共識，其實事在人為嘅啫，當局唔係話要「穩中求變、適度有為」嘅咩，明知唔啱數都唔求變，咁同極度水皮嘅前朝政府有乜分別呀！

當然啦，買東江水唔想做水魚，除咗用量問題，價格問題亦要考慮。好似現時嘅合約咁，定死每年加價百分之五至六，港府有無做咗羊牯嘅感覺呀？東江水一三至一四年度平均每立方米價格升到四元六角一仙，莫講話比新加坡向馬來西亞買水嘅價錢貴好多，就算同澳門買西江水相比，都貴咗一大截，港府係咪應該盡下精明掌櫃嘅責任，同內地好好商討呢個問題呢？

除咗價錢要傾，東江水多次被踢爆源頭受到污染，水質每況愈下，更加要關注啦。咪話太一叮唔提醒呀，趁住供水合約到期，港府要同內地當局傾嘅唔止係價錢問題，更重要嘅係水質問題，東江水近年唔係被人揭發源頭變咗垃圾河，就係深圳閘水區淪為大坑渠，咁搞法，東江水遲早變毒水，唔使錢都冇人要啦！

滾滾東江長嘥水，浪花淘盡資源。如果東江水繼續沿用定額收費模式，一來浪費納稅人公帑，二來糟蹋地球珍貴水資源，真係罪過。係人都知，內地污染嚴重，昔日錦繡山河，今日窮山毒水，港府任由東江水倒落鹹水海，就算內地當局唔覺得慚愧，港產官僚都應該感到臉紅啦，吓話？

一句講晒，港產官僚要學大禹治水，唔好做大愚治水，為港人，為環境，為地球，快快做好你哋份工啦，如果唔係，小心市民要你哋回水呀，叮！