SUN搞作：少膽虫手記：不能包庇病態腦細

繼淫賤黎喺寶島嘅《爛果周刊》度自爆自己有病，全間公司上下員工知道之後，都用心拍晒手……係用心拍晒手機短片慰問淫賤黎。少膽虫返到去自己位，發現枱頭成疊熱辣辣，明顯係啱啱錄起嘅CD，心頭馬上為之一「震」，感動得差啲要流下兩行虫兒淚。

少膽虫見有咁多員工都關心淫黎，好想將呢件事搞大。須知道，淫黎有事，關乎《爛果》嘅生死存亡，如果《爛果》收咗檔，恐怕堆填區即刻會多咗幾百個員工排隊見工。要救返淫黎，梗係將件事由寶島搬返嚟香城，做夠幾日A1，等多啲人知，話唔定有隱世神醫會自動出沒，獻身救返腦細呢！

條虫諗到呢條好橋，一股暖流即刻係心頭徐徐湧動，又係少膽虫上位嘅時候喇！於是條虫即刻捕住枱頭個電話，收到淫黎返嚟嘅線報之後，即刻衝入佢間房－－

「黎黎我諗到救你嘅方法喇！」少膽虫入咗淫黎間房，馬上憋不住，叫了出來！然而，眼前出現嘅係一位虛弱、疲憊嘅老翁，喺度執垃圾！少膽虫看傻了眼，不禁再次大叫「腦細，無見幾日，難道你真係……係時候喇？唔緊要，我幫你留定一星期A1頭條位！」

突然，少膽虫感到腦後受到一錘重擊，眼前直冒金星……「你條賤虫！你－咒－我？」向後一望，竟然係頭上插住金針嘅淫賤黎！少膽虫見淫黎的怪相，忍唔住再爆咗句：「黎黎我唔可以包庇你個病o架！我要學正義傳媒呀！我要救你呀！」但見淫黎的金針之上，火光直冒……今鋪杰喇！