政壇：政商定格：鄭維強一門多傑遍港星

新加坡同香港一樣，樓價都係居高不下，都係同樣要政府多次出招去遏樓價，但近期永泰地產嘅母公司、即係新加坡永泰集團嘅主席兼董事總經理鄭維強或有關人士正在放售大宅，市場估計最終成交價介乎二億五千萬至三億美元（約十九億五千萬至二十三億四千萬港元），比當地目前最貴住宅成交價一億零八百萬美元（約八億四千六百萬港元）貴一大截。如果單刁成事，當地政府唔知又使唔使再出招呢？

港人對鄭維強或者有啲陌生，查實佢哋一門幾傑，大哥鄭維健，係前聯交所主席，二弟鄭維志係永泰地產主席，三弟鄭維強被譽為新加坡公職王，係李資政密友，四弟鄭維新做好多香港公職，五弟鄭維榮做過新加坡旅遊局主席及藝術局主席。呢間新放售嘅大宅，位於大使館人員最愛嘅Nassim Road，附近有植物公園同港人熟悉嘅購物區烏節路。地皮面積八萬五千方呎。