政壇：政商定格：鄭錦鐘掌保良撐太座置裝

保良局尋日換屆，由Eric鄭錦鐘接任主席，各方好友嘅賀禮別出心裁。代理英國一個男裝品牌嘅總理陳正欣，為保良訂造會呔，藍底紅點夠晒醒目，限量只有九條，有錢都買唔到；金利來太子爺曾智明就都送上一百條領呔賀董事局換屆。Eric全家上下總動員打氣，鄭太Katie關巧妍穿上著名時裝設計師楊遠振設計嘅橙紅色連身裙，佢話預咗老公嚟緊多應酬，近日四出置裝，掃入多條新裙，仲搵埋教育局前局長孫明揚太太鍾小芬做形象顧問添。老婆「奉旨」Shopping，Eric話預咗月尾卡數大出血。

卸任主席嘅梁寶珠都表現風騷，過去一年晚晚工作至深宵，長期唔夠瞓，如今落莊，要好好充電。朝鮮半島緊張局勢升溫，北韓領導人更高調宣戰，陳正欣認為北韓只係扭計，唔會真打。