老人是寶不是草 齊來關愛祖父母

香港人愈來愈長壽，但係晚年生活亦愈來愈難受。點解？一來因為港府對老人刻薄寡恩，搞到清貧長者滿山滿谷。二來咯喎，因為子孫為口奔馳無暇他顧，當三代同堂嘅溫馨場面慢慢變咗集體回憶嘅時候，孤單寂寞就會成為老人嘅忠實伴侶。

香港嘅老人家有幾孤單？一項調查發現，本港家庭祖孫關係疏離，六成受訪青年過去三個月未曾陪祖父母食過一餐飯，另有近七成受訪長者表示，孫兒過去三個月內未上門探過佢哋一次，反映彼此關愛不足，家庭凝聚力鬆散。所以調查機構建議，將每年十一月嘅第二個星期日定為「祖父母日」，宣揚老有所養，提醒年輕人對祖父祖母表達關懷盡孝心。

俗語都話喇，家有一老，如有一寶。如果年輕人當家中老人係寶，點會三個月都唔去望下佢、錫下佢吖？設立祖父母日的確係有必要o架，所謂百行孝為先，唔理工作點忙，功課點重，抽啲時間探下祖父母都得啩，魯迅話過，時間象海綿，擠下就有吖嘛。

飲水思源，老人家劬勞一生無怨無悔，唔止為子女付上青春，亦為香港貢獻自己一生，無論係為人子孫，定係社會公民，都有責任結草銜環，畀老人家有個安穩、溫馨同有尊嚴嘅晚年。話時話，若然香港尊老重孝，老少和睦，社會都祥和啲、和諧啲，弒父殺母嘅倫常慘劇都少啲。

當然，設祖父母日推崇孝道仲有一個好重要嘅目的，就係提醒官老爺做番個孝順子孫，多啲關懷老人嘞。大家睇下，長者生活津貼今個月開始派錢，但係早前爆出申領程序甩轆醜聞，過程烏厘單刀一塌糊塗玩殘老人家。最可惡嘅係，港產官僚居然懶懶閒，又唔跟進，又唔補鑊，咁做同棄老虐老嘅忤逆子孫有乜分別吖？

滿清封建時代，康熙同乾隆都舉辦過多場千叟宴招待長者，君民同樂，雖然做騷成分居多，總算表達咗愛老敬老尊老嘅一點心意。家陣港府庫房堆滿金山銀山，但係對老人孤寒成性錙銖必較，護養宿位等到公公婆婆兩腳一伸都係唔夠，全民退休計劃講到頭髮白都未有，施政簡直比封建王朝仲不如。難怪有人話，最需要祖父母日提醒孝道嘅人，唔係年輕人，而係港產官僚呀！

一句講晒，老人是寶不是草，齊來關愛祖父母。為官者又好，為人子孫者又好，都應該敬愛長者，唔使等到十一月o架，就由今日開始，大家一齊多啲關愛老人，咁樣香港就開心啲、健康啲，叮！