SUN世代：揸鑊鏟有文化

命中注定做廚房？江肇祺出身廚藝世家，家族三代出名廚。他十五歲入行，跳入廚房好像是命中注定。在廚房打滾逾二十年，經歷高低起跌，試過兩年升幾級，超架勢；又嘗過失業三個月，無飯開；漸漸他學會珍惜，由年少輕狂小伙子，蛻變為成熟穩重大丈夫。眼見世人對中廚的偏見，他誓要為中廚「升呢」：「人人覺得中菜廚師係攝住份馬報，踢人字拖嘅爛賭鬼，其實中廚都好有文化。」

眼前的江肇祺，談吐謙厚，很難想像他年少輕狂的歲月：「做咗廚房廿幾年，頭十年可以話毫無難度，要乜有乜，人工年年加、不停升職；不過近呢十年我就體會到世態炎涼，明白賺一蚊係好難嘅事，我學會珍惜。」

人稱祺哥的江肇祺，出身廚藝世家，家族名廚輩出，外公是世界十大名廚之一，爸爸和哥哥是香港名廚，最威水的是叔公，曾榮膺日本小菜王。擁有名廚的遺傳基因，他自小對煮食有濃厚興趣，奠定日後勇闖廚藝界的基礎。　

十五歲那年，他揸起鑊鏟：「讀書唔成，當年爸爸喺日本著名酒店做廚，但佢辭工返香港睇住我，帶我入行！」入廚做學師仔，定必歷盡艱苦，然而他的路卻比人平坦。因外公是飲食集團總廚，受家族庇蔭，他「職位升得快、人工加得多」，兩年內已跳升三級，二十三歲已升至二鑊。升職如坐火箭，惹人眼紅之餘，亦令他氣燄日高。

「升得高、跌得快，人愈囂，愈易輸！」不久後他遇到挫折：「有次我煮緊嘢，個總廚走嚟同我講倒咗碟菜，當時我深深不忿，後來總廚煮一次畀我食，我知自己輸咗！」自此，他潛心苦練廚藝。

升得高、跌得快，人愈囂，愈易輸！

○三年是江肇祺人生的轉捩點，他以八十萬元投得香港賽馬會一個地方開餐館，雄心壯志：「嗰度乜都無，自己置架生，買傢俬，申請牌照。」他全心湊大「親生仔」，凡事親力親為，可惜未能收支平衡，一年後賽馬會要收回其營業權：「咁辛苦都無錢賺，我深深明白賺一蚊係好難，以前啲日子真係得來太易。」

老闆夢碎，幸得舊老闆賞識，邀請他到日本做主廚，他心想：「仲唔好似叔公咁做小菜王？」但世事難料，他面臨人生第二次失敗，因不懂日文，很快就不適應日本生活而回港。回港後，原以為很快找到工作，失業三個月後，仍無人聘用：「中廚係唔會睇報紙搵工，多數係人介紹。睇報紙見工嘅多數都唔請。」

殘酷現實令他被迫低頭，惟有揭報紙搵工，他在報紙「圈」了一份工：「我見到灣仔中菜館請廚師，就去試，成家人要食飯，無晒計。」結果獲試菜成功，他贏得一份工作，得老闆賞識，再連升幾級，其後更獲酒店高薪挖角：「有五星級酒店總廚嚟食，覺得好好食，問我可唔可以過檔幫手，之後就愈升愈高，做到今日嘅中廚總監。」

失敗過、成功過，回想那些年，他直言年少輕狂：「細個乜都唔識，覺得乜都係應得，但經過失敗，我學會珍惜，依家我仲有個使命，我要改變人對中廚嘅想法，其實中廚都會識英文，好有文化o架！」

江肇祺小檔案

現職：帝京酒店中式廚藝總監

興趣：烹飪、鑽研菜式