政壇：政商定格：方國珊萬個口罩周街派

好多香港市民都擔心H7N9禽流感襲港，西貢區議員「哪吒」方國珊話眼見政府冇乜舉動，自己即刻磅水四萬幾蚊買咗一萬個口罩，呢幾日都喺將軍澳派街坊，將傳染同感染機會降至最低。佢話最開心係啲口罩好快派晒，證明街坊都有好高防疫意識。

雖然有網民話哪吒抽水，事關今次禽流感未發現人傳人個案，派口罩都冇乜用，包住口罩嘅膠袋仲印住方國珊個名添。不過哪吒就話特登買N95口罩，雖然每個口罩成本要四蚊係貴啲，但因N95除咗可阻擋細菌外，最大功能就係過濾大部分塵粒，啱晒將軍澳居民，因為佢哋日日要飽受堆填區帶嚟嘅廢氣同微塵粒子，就算無禽流感都可以用得着——就一日咁多喇。