政壇：搞搞政：街坊盼公用 李惠利地皮

究竟九龍塘前李惠利校舍地皮應該用嚟做乜？政府想話起住宅增加房屋供應，浸會大學就話想興建中醫學院，呢場地皮爭奪戰爆發咗成個月，但好似冇人理過當區居民意願。原來當區居民有第三種諗法。

當區區議員何顯明批評政府嘅決定無理過區議會係咪反對，簡直無視居民意見。佢話收集過居民意見後發現，佢哋根本唔想塊地起樓，至於浸大興建中醫院，佢話大部分居民都冇乜意見，只係覺得塊地皮咁大，如果畀晒浸大做醫院，似乎有啲浪費。

咁到底做乜好？原來地區人士認為應該起多一間社區會堂。何顯明話依家九龍塘有唔少中產居民，但一個社區會堂都無，老人中心都係得一間，反而鄰近嘅深水埗有十幾個社區會堂，老人設施亦多不勝數，令九龍塘區內市民搞活動好唔方便，所以區內居民睇中李惠利入面嘅禮堂，希望改成社區會堂，屆時居民就有個公共空間搞社區活動，政府亦唔使拆晒成座禮堂咁浪費。不過政府冇諮詢地區意見，一嚟就話要列入勾地表。