政壇：鄭錦鐘要為保良換新衫

新任保良局主席Eric鄭錦鐘夫婦尋日孖住入馬場，見到記者即主動大派新卡片，仲展示由佢操刀設計嘅新徽章。佢話呢個徽章係紀念保良局成立一百三十五周年嘅特別版，佢仲邀請到國學大師饒宗頤親筆題字添。講到就任後嘅大計，佢笑稱，希望該局上下齊心，為善團「換新衫」喎！

點樣「換新衫」法？佢解釋話以前善團規模較細，二十個總理尚可應付，依家總理人數不變，但服務範圍倍增，就好似一個人肥咗，再着唔落件舊衫，係時候要換過件新衫喇。佢認為適逢該局周年誌慶，係時候借助過去百多年經驗回顧同檢討，並整頓一吓管理模式。

講到嚟緊活動，佢話當然唔少得為該局搵「水喉」，頭炮係五月舉行嘅粵劇笑片籌款活動，遲啲會舉辦開放日供市民參觀，又會製造展板舉行巡展，畀大家更了解該局嘅歷史。