政壇：李梓敬守得雲開踏台板

貨櫃碼頭工潮鬧到熱烘烘，但尋日港台《城市論壇》邀請相關人士同台討論就慘遭冷待。節目開始冇耐，節目主持就匯報各方人士婉拒邀請嘅因由，例如勞工及福利局話要低調處理事件，不宜高調表態，而香港國際貨櫃碼頭（HIT）董事總經理嚴磊輝話，佢係公司唯一發言人，但佢唔得閒出席。商界代表方面，經民聯副主席林健鋒亦話唔得閒出席，富貴黨主席周梁淑怡有出席，佢坐喺台下負責監場，事關維園台下常客富貴黨青年團主席李梓敬喺商界代表匱乏嘅情況下，終於有機會上台做嘉賓，咁樣唔知係咪叫做守得雲開見月明呢？

工會方面，繼續由職工盟獨擔大旗，而外判商永豐華哥就話因罷工運動已幾日冇返過屋企，要返屋企唔得閒出席。至於近日因怕製造混亂，工聯會就繼續冇影，主持話曾邀請過工聯會黃國健出席，但對方遲遲未回覆。