政壇：郭家麒抽水變甩轆

正當大家都就「佔領中環」運動你一言我一語之際，向來「事事關心」嘅公文袋立法會議員郭家麒，亦唔執輸玩埋一份，失驚無神以個人名義「代表」醫療界成立醫療服務隊，聲言要為參與佔中嘅市民提供醫療支援，可惜尋日現身撐場嘅只得小貓三、四隻。

本身係醫生嘅郭家麒花咗幾日時間拉雜成軍，成立呢支醫療服務隊。眾所周知「佔領中環」強調和平、理性、非暴力，佢早咗成年成立醫療服務隊，係咪預知運動會暴亂收場？佢解釋，只係擔心屆時會有人借機生事，又強調唔理傷者係咪支持佔中都會救。咁係咪暗示滋事者有可能來自反佔中人士？

自命孫中山聖雄甘地

雖然呢支醫療服務隊「代表」整個醫療界，但郭家麒承認至今只係得十幾個醫護人員表態支持，所以佢哋即日起會透過社交網站招募更多醫護人員參與，有信心「（招募）幾十個相信冇困難」咁話。郭家麒期間仲自命孫中山先生同印度聖雄甘地，話兩位英雄當時做嘅嘢都係非法，佢誓言願意犧牲個人專業資格，唔怕被人拉，仲呼籲唔同界別嘅專業人士都出一分力咁話！

一番慷慨演辭後，輪到間唔中會同郭家麒拍住上示威嘅發起人之一、麻醉科專科醫生胡可源，發言時竟表示「唔理解佔中」，又對呢場運動「存疑」。

接受我哋訪問時更揚言自己每日工作量已經夠多，要佢放工後留守中環真係咪搞，呢場運動只會入一入會場「精神上支持」。吓！究竟搞乜o架？好明顯係郭家麒冇解釋清楚畀人聽，甩晒轆喇，今次真係唔知佢點收科？