《太陽》贈送現金券 點只超值咁簡單

形勢所逼，事非得已，由於各項成本不斷上漲，《太陽報》由四月七日即今日起向上調整售價一元，每份賣七元，呢個係無奈嘅決定，相信讀者一定可以理解嘅。大家都知喇，東方報業集團已超過十二年冇加價，十二年來通脹肆虐，物價飛升，加價一元只可稍為彌補成本嘅咋。

再講吖，話就話加價，但《太陽報》連續一個月隨報附送便利店或超市現金券，由兩元至五元，名加實減，回饋讀者，聰明嘅你一定識得計數啦。道理好簡單，目不暇給嘅精彩內容，配合提神醒腦嘅悅目版面，大家付出七蚊買到一份重量級報紙，除咗享受精神食糧，仲可以享受現金券，點只超值咁簡單。

當然啦，《太陽報》獲得讀者支持，銷量穩佔中文報章強勢第三位，主要唔係講金，而係講心。簡單嚟講，即係落足心機改革版面，強化內容，務求以更豐富更精彩更紮實嘅內容回饋讀者。

就講港聞A疊吖，今次改版增加一張紙，增設專題式報道，揭露本港及內地嘅社會陰暗面，為市民及讀者出氣，淨係呢樣都夠晒吸引喇。眾所周知，近年內地黑心食品愈揭愈多，愈揭愈恐怖，加上環境污染，烏煙瘴氣，老百姓唔只冇啖好食，連飲啖乾淨水、吸啖新鮮空氣都可遇不可求。呢，最近華東爆發新禽流感，搞到人心惶惶，今次睇怕都係貪官及奸商惹禍嘅喇，你話係咪抵鬧吖。所以話，太陽一出，牛鬼蛇神無所遁形，叮！

至於B疊財經，同樣落足料炮製o架。今年外圍環境變幻莫測，股市及樓市起伏不定，危機處處，陷阱多多，教投資者如何趨吉避凶，係《太陽報》財經版嘅主打。「Sun Monthly」、「金融達人」、「Econ Living」、「Sun租盤」、「講股你要知」等等，太一叮一口氣數唔晒咁多，惟有留待讀者自己發掘。

仲有吖，年輕人最鍾意睇娛樂新聞，呢樣本來就係《太陽報》嘅強項，呢次加碼，除咗讀者一向追捧嘅名人專訪，仲增加同藝人互動交流嘅至Fun微博，配合漫畫，夠晒趣味性。至於副刊，同樣有新貢獻，由新進才子主持名人會客室，同嘉賓互動，隨時擦出火花，一定唔會令讀者失望。《太陽報》話明係年輕人嘅報紙，又點少得至潮至In嘅玩意吖。呢，科技版將會推出新專欄，專門介紹好玩兼有趣嘅Apps，有意升呢做IT潮人或科技達人嘅你，又點可能錯過吖。

毛伯伯用「早上八九點鐘的太陽」比喻年輕人，計太一叮話齋，《太陽報》如日方中，銳意改革，版面創新，不落俗套，正正係年輕人嘅最佳報紙。總而言之，有太陽，就有希望，多謝各位讀者捧場！