SUN奇古怪：【政棍】Zing3 Gwan3

工潮持續咗逾十日，特區政府終於有人從水底冒出，勞福局長張建宗出嚟話其實好關注今次事件，又話叫咗勞工處出力斡旋。結果係點？本來約咗勞資雙方坐低傾吓，點知資方毫無誠意，完全唔畀面政府，當你政府冇到，結果工人代表白等一趟，決定返碼頭繼續抗爭。特區政府喺呢件工潮事件中又係一事無成。今次工潮喚醒咗公眾關心碼頭工人辛酸嘅生活。到咗今日，嗰班平時口口聲聲撐工人為基層嘅政黨，依然繼續潛水，咁呢啲人唔係「政棍」又係乜？

潮語「政棍」係改自「神棍」，意思係有啲政客就好似神棍一樣，唯一唔同嘅係，神棍騙嘅係財，「政棍」騙嘅係選票同政治資本，至於有無騙色，就只有「棍」人自己先知。

咪以為「政棍」或「神棍」個「棍」字真係一碌棍咁解，原來呢個「棍」字係大有故事，頗為有趣。話說滿清時代嘅反清志士，成立秘密組織「洪門」，一直從事反政府工作。後來民國成立，無清可反，「洪門」產生質變，搞另一種同反清一樣都係唔見得光嘅工作，即係各種非法活動，輾轉發展為今日嘅地下社團。當時，新加入幫會嘅兄弟，都叫做「棍」，因為兄弟又稱為「昆仲」，而旁邊「木」字，其實係「十」同「八」合寫，代表當時中國十八省，即係嚟自五湖四海「十八省昆仲」暗號就稱為「棍」。新入會兄弟多數從事簡單嘅欺詐工作，所以有所謂「棍騙」一詞。粵語「騙人」亦叫做「昆人」估計來源都係差無幾。

呃神騙鬼就稱為「神棍」，啲唔老實嘅律師專呃訟費又可以叫「訟棍」，寫文呃錢嘅叫「文棍」。咁香港到底邊啲人係真正嘅「政棍」？邊啲人口口聲聲話真誠為香港，但身體卻很誠實地，次次出賣港人利益？呢啲人同強國所有嘢一樣……就係假到無朋友!