政壇：廖長城娶韓國新抱

全國政協委員兼行政會議成員廖長城（Andrew）嘅長子廖俊揚（Christopher），與在港從事財經業務嘅韓籍女友Evelyn Kang，尋日下午喺中環聖約翰大教堂舉行婚禮，近五百位親友同政商名人聚首一堂，Andrew首度做老爺，全程笑到四萬咁口，佢透露一對新人邂逅於教堂，尋日又喺教堂邁進人生新一頁。講到親家，佢大爆佢哋全家都係大學教授，親家老爺更係南韓著名嘅植物學專家。問佢同韓籍新抱有冇溝通困難？佢話雖然新抱唔識講廣東話，但用英文溝通一樣得，仲笑言畀新抱一百分。

新郎哥Christopher別出心裁，拎起結他自彈自唱。佢喺英國修讀音樂系博士嘅妹妹Yvonne特別返港，為哥哥自組十八人合唱團，自己客串做埋指揮唱聖詩。佢弟弟Jonathan就化身公關，幫哥哥接待來賓。

行會非官守成員超過一半成員到賀，包括林煥光、周松崗、李國章、張震遠同葉劉淑儀等，官場就有政務司司長林鄭月娥、發展局局長陳茂波同商務及經濟發展局局長蘇錦樑等。