政壇：政界花名貪曽精警

政治人物有花名係好事定壞事呢﹖尋日幾個立法會議員及名人出席大專辯論比賽時客串一場，就政治人物嘅花名一事展開辯論，結果由代表正方嘅人民力量慢必陳志全一組贏出，綜觀比賽，唔係慢必佢哋嗰組辯論技巧出色，而係香港政界中花名政治人物太入型入格幫咗正方。譬如辯論中提到，貪曾曾蔭權爵士自從個花名由以前嘅煲呔曾變咗貪曾後，貪婪形象好似即刻深入民心咁，而因為英文名叫Elizabeth，加上姓Quat而得咗花名叫EQ嘅建仔葛珮帆就代表負方，佢呻落區時老街坊唔識嗌佢個名，問佢「乜Q話」﹖

慢必同EQ在內嘅嘉賓尋日就「花名對政治人物有利」正面交鋒，正所謂唔怕生壞命，只怕改壞名，反方嘅EQ話，大家亂咁幫政治人物改花名會醜化佢哋，擔心呢啲花名會將政客「妖魔化」，好似前特首董建華被改個「老懵董」嘅名，同「貪曾」曾蔭權咁，二人都因為呢個改壞咗嘅花名，最終都衰開有條路。

蔣麗芸唔開心咗一排

EQ仲趁機幫被譏笑為「元秋」嘅民建聯黨友蔣麗芸（Ann）出頭，大爆Ann為咗呢個啜核花名唔開心咗好一段時間！佢話，Ann曾經自問「邊似元秋呀？」最後要由啲黨友氹阿Ann，話「元秋其實有俠女風範」，加上網民日叫夜叫改唔到口，Ann惟有無奈接受。代表正方嘅慢必就力撐花名好，話自己多得個花名先畀人留意、記得。

其實，兩名前特首得到「老懵董」同「貪曾」嘅花名都係自己種下嘅因，譬如老懵董推出「八萬五」房屋政策，施政又懵事多多；貪曾亦因為佢被本報揭發佢貪盡海陸空而得名，絕對冇將佢哋妖魔化喎。正所謂人貴自知，如果政客唔想畀人改個勁辣嘅花名，就應該好好反省一吓自己究竟做過咩衰嘢，淪落自己被譏為貪曾、周一鑊咁大鑊喇！