《太陽報》調整售價 現金券回饋讀者

叮叮噹！太一叮今日想同大家講兩樣嘢。第一樣，由於成本不斷上漲，《太陽報》不得不於四月七日起調整售價至七元；第二樣，《太陽報》回饋讀者，四月七日起贈送現金券，連送一個月！

講起調整售價，真係十分無奈o架，大家都知啦，東方報業集團以讀者為先，十二年來一直維持六元售價不變，唔似得各行各業跟隨通脹不斷加價，尤其係地產怪獸動不動就成倍咁加租，搞到百業艱難。問題係，隨着各項經營成本大幅增加，紙價不斷上升，已到咗不勝負荷嘅地步，《太陽報》不得不調整售價一元，事非得已，相信讀者可以見諒嘅。

其實，聰明嘅讀者一定識得計數，畀多一元買份內容豐富兼版面精美嘅《太陽報》，得到嘅唔止係快夾準嘅新聞報道以及各類資訊，仲有現金券回贈，簡直係物超所值喇。大家記住吖，《太陽報》四月七日起隨報附送現金券，包括7-11或OK便利店兩元現金券，或者百佳超級市場五元現金券，輪流推出，人人有份。嗱，只係畀多一元，就可以得到兩元或五元現金券，讀者有賺，條數好易計啫，係咪。

當然啦，熟悉本報作風嘅讀者一定知道，回饋讀者唔會淨係附送現金券咁簡單嘅，因為讀者最關心嘅係內容夠唔夠豐富，版面夠唔夠精彩。太一叮可以拍心口保證，調整售價之後嘅《太陽報》只會精益求精，內容更加豐富，版面更加精彩，絕對唔會令大家失望。

舉個例子吖，新聞A疊將會增加一張紙，呢一張紙將會帶畀大家無窮無盡嘅猛料，有時係大揭秘，有時係大控訴，總之同廣大市民息息相關。

再以B疊財經為例吖，如果大家覺得今年股市同樓市都起伏不定造成危機處處，唔知點樣投資，咁就要留意《太陽報》嘅強化內容嘞，讀者隨時可以趨吉避凶，趨利避害o架。其他版面又點樣強化呢？咁講喇，強化內容係全面性嘅，由於篇幅所限，太一叮唔可能一一臚列，只有留待讀者自己發掘。

講開又講，取諸社會，用諸社會，一向係東方報業集團嘅宗旨，所以，提到《太陽報》，就唔能夠唔講太陽報愛心基金。基金以清貧家庭及學生為主要服務對象，成立十幾年來幫助無數弱勢社群解決生活、學業及就業問題，得到善長熱烈支持，受到各界一致讚賞。正所謂，為善最樂，福有攸歸，多謝各位善長支持，希望大家再接再厲，令香港充滿愛心，令明天更加美好！

古人話，苟日新，日日新，又日新。《太陽報》不斷創新，精益求精，一定會繼續回饋讀者！