SUN驚奇：收費隨口噏勁掠賺三倍

近年，愈來愈多的士司機加入「黑的」行列，業內人士踢爆，「黑的」不按錶收費，開價隨口噏，收入隨時較按錶收費高出三倍，雖然「黑的」犯法，但為賺到盡，不少司機仍甘願鋌而走險。

「我走一轉都唔使半粒鐘，就可以賺差不多一百蚊，如果嗰日好彩，單接單都搵到千幾二千蚊o架！」一名不願透露姓名的「黑的」司機自爆，年前已加入「黑的」行列，高峰期收入可達三萬元。

「『黑的』唔按錶收費，個價自己嗌，專劏遊客，走一轉收三五百蚊，好肥仔o架。」汽車交通運輸總工會的士司機分會副主任勞士正坦言，「黑的」司機收入較正規司機豐厚，扣除租車及加氣錢約五百多元成本後，收入高出正當司機三倍，自然令更多人加入揸「黑的」：「佢哋嗌高個價三倍，收入自然多，如果劏得多遊客，一日可以賺到幾千蚊添。」