Sun奇古怪：Sun潮語：神器

近日朝鮮半島局勢趨緊張，為應對美韓即將進行軍演，美國收到風，指北韓開始在東岸部署流動導彈發射器。唔知北韓領袖金正恩係咪唔抵得同佢身形差唔多嘅Psy，可以憑一首「江南Style」征服世界，所以都係肥仔嘅佢，又想喺世人面前露兩手。你知啦，佢手揸可以消滅美國嘅核彈，無理由輸畀個南方騎呢大叔。既然Psy可以喺美國大顯身手，佢都要亮出金氏家族幾代研究經年、寧願國民餓死都要煉成嘅「神器」，用以震懾美帝，要全世界都向佢俯首稱臣！

潮語「神器」有多個意思，不過大意都係差唔多，都係「神級器材」咁解。去得到神嘅境界，Level當然係最強，要係最Top嘅Model至會被封為「神器」。例如自拍功能最強嘅相機，可以叫做「自拍神器」，最強打機功能嘅手機叫「打機神器」。如果應用喺打機層面，最強嘅武器都會叫做「神器」。有啲小朋友甚至大朋友，不斷買點數卡入錢升呢，練就一把無敵「神器」，最後被網上罪犯偷走，呢個時候就真係唔慌唔「神器」，不過係冇厘「神氣」。

「神器」呢個字最先嚟自網上遊戲，有啲遊戲中嘅「神器」，除武器之外又會係指神仙用嘅器具法寶。維基百科中「神器」更指一啲現實世界中，某啲國家統治者所擁有嘅象徵性物件。例如中國古代帝王嘅玉璽、代表日皇嘅「三神器」、英王嘅冠冕同權杖，當然唔少得黑社會嘅龍頭棍，都係屬於「神器」嘅一種。現實世界裏面嘅「神級武器」，肯定可以叫做「神器」，都可以係權力嘅象徵。眾所周知，世界上擁有核武「神器」嘅國家，係惡啲神氣啲，話事權都大啲。如果一個有「神器」嘅國家，再加埋個「神神哋」嘅領導人嘅話，又真係難免令周邊地區神經緊張……金正恩，唔係話你呀……切勿對號入座。