政壇：搞搞政：扶貧小組唔做嘢 KK捱轟

因為政府重設嘅扶貧委員會開咗幾次會仍未就訂立「貧窮線」達共識，社會開始質疑扶委會係咪真係做到扶貧工作。但立法會一直存在嘅扶貧小組委員會（小組）竟亦被指做唔到嘢，且仲廢過扶委會，而呢一切皆因身兼扶委會委員嘅小組主席民協KK馮檢基而起。點解？咪因為佢太滋陰，大家都唔知佢想做乜囉。

例如當社會討論緊「貧窮線」時，小組竟討論「房屋與貧窮」呢啲虛無縹緲嘅議題，而且仲搵唔到局長級官員出席，搞到班議員冇晒癮，話小組嘅會議猶如「口水會」喎。曾試過有議員喺會議期間向特別邀請出席嘅官員提質詢時，KK竟然話秘書處都了解情況，等佢哋解釋都得，令其他委員好不滿，話佢浪費時間。而當身兼小組副主席嘅工黨張超雄提議，邀請能代表政務司司長林鄭月娥出席嘅官員去小組交代扶委會正進行嘅工作，KK就話官員唔出席就去信譴責。搞到大家都摸不着頭腦，總之就唔知呢位主席做緊乜咁話。

有委員話KK如果繼續咁主持會議，隨時有機會被叮走o架，而由張超雄補上就係一個唔錯嘅選擇。