政壇：單雞遊峇里不忘投資

早前立法會復活節假休會，多名議員都趁機同家人外遊叉電，其中「單雞」單仲偕就同老婆遠離煩囂，去咗印尼峇里島玩咗四日，潛水睇珊瑚歎世界。不過一向投資有道嘅佢，外遊都帶埋本投資書去慢慢睇。尋日香港股市因內地禽流感威脅而大跌，唔知佢又點睇呢？

單雞今次已經係第四次遊峇里，最鍾意係喺當地做SPA同潛水，仲有包車遊山同品嘗當地嘅特產貓屎咖啡，夜晚睇陣書就上床瞓覺，認真識歎。

對於港股尋日因內地禽流感疫情而大跌六百幾點，單雞就自言中長線仍然睇好港股，認為今次只係升咗一段時間之後，借勢中場調整，建議投資者唔好自亂陣腳，騰騰震急急放晒啲貨驚埋一份，當然如果係炒「即日鮮」嘅就例外喇！