政壇：黃家和鬧爆防疫鬆懈

內地變種禽流感H7N9疫情持續升溫，其中上海係最多感染個案同最多病人死亡嘅地方，原來香港餐飲聯業協會會長Simon黃家和早幾日咁啱去咗上海公幹，好彩返嚟之後身體冇任何唔妥，大家唔使緊張。

Simon爆料話當地居民對於疫情消息版本多多，有內地朋友就向佢發出短訊，話除咗出現大批死豬外，亦傳過上海有牛隻大規模死亡，不過做開飲食界嘅佢並冇特別驚，繼續好似往常咁周遊當地嘅大街小巷，發現上海徐匯區嘅小販依舊當街販賣同宰殺活家禽，未見有特別處理措施。

堅持「每月一飛」

喺H7N9勢將南移襲港之際，早幾日被揭發當局喺本港入境防疫嘅工作做得好粗疏。Simon話前日由疫區返回香港時，亦冇人特別查問佢喺邊度返嚟，覺得滬港兩地都對疫情相當鬆懈。佢叮囑兩地政府吸取十年前沙士嘅慘痛教訓，強調處理疫情最緊要係迅速，寧願「過火」都好過做漏。聽佢咁講，即係內地同特區政府嘅防疫工作太鬆懈喇！咁又係嘅，眼見內地爆發H7N9嘅個案愈嚟愈多，特區政府絕唔可以掉以輕心嘅。

內地爆發變種禽流感，歐洲同中東就有新沙士，但做慣「空中飛人」嘅Simon未有因而減少周圍去，未來仍會繼續「每月一飛」，其中本月稍後時間會去法國，五月份到印度新德里，六月份就去美國加州。Simon真係要好好保重身體，唔好感染任何傳染病，否則病毒好快就會跟住佢散播全球！