水貨客見招拆招 限奶令隨時跪低

港府出盡飲奶之力打擊水貨活動，「限奶令」實施超過一個月嘞，成績如何呢？官老爺話喎，水貨活動已經有所收斂，你信唔信吖？嗱，如果你信，就太傻太天真嘞，只要去羅湖口岸睇吓，包你大開眼界。

係咁嘅，自從實施限奶令之後，職業水貨客紛紛變陣迎戰，羅湖口岸一帶湧現香港奶粉收購檔，以平均每罐賺二十元人民幣價錢，向來往兩地旅客收購奶粉。簡單啲講，呢招叫全民皆兵，或者叫全民皆奶，一招銀彈戰術就將每日幾十萬旅客變晒水客，問你仲點堵截！

嗱，收奶檔一出，限奶令真係隨時收得檔o架。你知啦，兩罐奶粉賺四十元，已經多過一程過境車費，對好多師奶同老人家嚟講，真係有吸引力o架，全民皆奶嘅港式奇景隨時出現。日前之嘛，本報記者現場直擊，發現成個口岸區淪為奶粉集散地，收奶檔貨如輪轉生意興隆，足證限奶令效用有限啦。

所以話，你有張良計，佢有過牆梯，你有限奶令，佢有收奶檔，當局真係冇符o架。係人都知，買賣奶粉唔係犯法，唔通完全禁止旅客帶奶粉過境呀？唔通以後買奶粉要申請批文呀？定係直頭禁止奶粉買賣呀？對唔住，就算當局真係咁做，水客都有辦法對付嘅啫，香港法例點樣嚴厲都好，始終唔適用於羅湖嘅啫，係咪！

天下熙熙，皆為利來；天下攘攘，皆為利往。講到尾，只要內地市場有需求，只要有利可圖，水貨問題就會禁之不絕，根本無可能一個限奶令就搞得掂。樓市就有辦你睇啦，樓宇長期供不應求吖嘛，樓價咪愈壓愈升囉，治本辦法惟有闢地建屋，增加供應，供應唔增加，出乜嘢辣招都冇用喇。嗱，連美國學者都話，香港奶粉大受內地同胞歡迎，本來係一個商機，而唔係煩惱，港府唔去協調奶粉商，增加供應，順勢發展奶粉進出口生意，反而冇嗰樣整嗰樣，搞乜嘢限奶令限制奶粉進出口，唔只不智，仲隨時影響自由港地位添！

無錯嘞，港產官僚嘅智商可能真係低過未戒奶嘅嬰兒。古人話，治大國如烹小鮮，意思即係唔好瞎折騰吖。港府啱啱相反，治理小小一罐奶粉，居然對旅客又拉又鎖又罰，甚至搞出告錯人嘅國際笑話，呢啲咪叫做矯枉過正囉！

一句講晒，奶粉水貨禁不絕，堵塞不如增貨源。港府唔好再頭痛醫頭，腳痛醫腳嘞，快快諗計增加奶粉供應啦，咁至係治本之道吖嘛，叮！