SUN搞作：打橫嚟講：H7N9仲未殺埋身？

擒日，喺大陸內地，又再有人中招，感染H7N9流感病毒。中央當局聲稱至今，只得十宗確診個案，但全中國，大部分民眾都唔信政府，話由三月初「病發」，到依家，怎會得「咁少人賴嘢」！

一個自詡強盛的大國，建國六十四年，仍未攫取人民信任，即使唔羞家，也是不是好應檢討檢討，自省吾身呢？

鬼咩！全國無一樣嘢係真嘅，除了騙子之外，點叫人有信心吖？

遠的不說，淨係早前上海灘沿岸流域之死豬屍浮記，有關當局諱莫如深，從沒就事件講過一句解釋。全球皆知的，喺大陸，只要能make money的，死魚都要過刀啦！好端端，咁大隻「肥豬」，就算死Q咗，也有無良賤人，割肉削骨剁碎，火煎油炸，爆番香之後，再加兩滴「滴滴香」，包裝成美食，當無事發生過咁照賣賺錢；如今，居然有錢唔要，好大嘥地「揼晒落海」，咁反常、咁違反佢哋強國人嘅「人性」，點會無景轟吖？但在大筆維穩費之下，又和諧咗，無人追問喎！好嘞！家陣，喺上海附近之浙江蘇杭長江一帶，爆發新品種流感病毒，同死豬有無關連呢？大陸嘅「中國疾控中心」並無mention，只話過呢隻新病毒仲未查到佢嘅源頭。

最大鑊的，既無法追尋病源時，該中心卻呼籲民眾可飲用「板藍根沖劑」預防，咁兒戲，你話死唔死吖？

大陸任何天災人禍，一定影響香港的，今劑H7N9殺到了！但香港食衞局高永文仲話毋須提升應變級別喎！信佢死得啦！點算呢？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府