SUN搞作：少膽虫手記：淫賤黎玩分身

壹全霉爛股連日被洗倉狂跌，就快「升仙」咁款。早排少膽虫獻出判上判大計，企圖救亡，淫賤黎難得賞識，就叫少膽虫入房幫手度橋。「嗱嗱嗱！少膽虫，由壹至玖拾玖全霉都畀我註冊晒喇，你負責將啲記者編輯分派入去，到時有咩欠債呀欠薪呀，都唔好搵我！」淫賤黎劈頭就向少膽虫公布呢個「喜訊」，少膽虫惟有陪住笑咁問：「家陣我哋追咬緊人哋假外判，好似唔係咁好睇，會唔會遲啲先……」

「少膽虫！你個腦裝屎o架？」淫賤黎大動肝火，直斥：「你喺度做咁耐，仲同我講，理人點睇？睇嚟要由你班老腫社長入手先得喇！」

「唔好少我呀！」少膽虫心急如焚：「少邊個都得，唔可以少咗我o架！少膽虫做開高層工作，自己一個高處不勝寒呀！你可以叫十九才子做拾玖全霉，但係少膽虫唔可以唔做壹全霉！」

淫賤黎遞張證過來，安撫道：「唔係兜你，仲畀個董事你做添！」少膽虫口震震問：「董事？係唔係行政失當，打錯字o架？」

淫賤黎眼角上揚，好自豪咁話：「你哋學我咁，就去註冊幾間公司，扮自僱人士。到時有咩糾紛，就只係『若智英賣淫集團』或者『淫賤黎有限公司』爭『少膽虫老作室有限公司』筆數，勞工處都唔使旨意去！」

少膽虫今次真係公而忘私，完全無諗到自己畀佢剝削，真係拜服淫賤黎一點就明之餘，仲天生財技過人。「好橋！呢個咩『淫賤有限公司』一定可以壟斷全港淫業！」少膽虫忍唔住讚嘆。

「係『淫賤黎有限公司』，唔係『淫賤有限公司』！」淫賤黎胸懷大志，遙望堆填區：「淫賤，點可以有極限？」