政壇：搞搞政：前任特首辦打躉貪曾舔到盡

東方報業集團舊年二月，獨家踢爆「貪曾」前特首曾蔭權爵士貪盡海陸空嘅醜聞，震撼政商界，但貪曾嘅惡行一不離二，原來佢仲有鋪使人唔使本嘅心癮，事關佢當時入住禮賓府時，對裝修方面要求多多，之後佢嘅家庭同私人事務都要政府中人處理埋一份，當時大家都對此敢怒不敢言，而佢仲以為自己做緊皇帝。

再講，話說曾太當年做特首夫人亦活動多多，而佢對支援同事態度一般，唔係特別客氣。兩公婆舊年六月三十號前搬離禮賓府時搬走嘅逾千箱細軟中，除有大量侵吞得嚟嘅茅台外，原來仲有曾太嘅兩大箱各式各樣嘅浴帽，唔知係咪去豪華外訪時「搜集」返嚟嘅紀念品。

貪曾卸任後，政府仲未可以「脫苦海」，因佢依家如果喺香港，就去位於半山嘅前任特首辦公室打躉，佢已經一無所有，惟有喺呢度發下夢，以為自己仲係大權在握。佢幾乎將公務私務留晒喺前任特首辦度做，最常見嘅做法就係用前任特首辦嚟見各界人士，究竟當中有幾多係必要會面嘅冇人知。之前我哋已收到料，話佢搬入前任特首辦前，要求多多，包括巨型電視、酒櫃同上網設施等，搞好晒啲設施，依家就去歎世界。貪曾人走茶涼後仲要「舔盡」官方資源，認真係「江山易改，本性難移」嘅典型寫照。