政壇：真普聯擬設篩選門檻

喺成功拉攏二十七個泛民立法會議員加入後，真普選聯盟下一步將向民間組織招手同埋組成一個學者顧問團，料顧問名單將喺兩至三個星期後公布。

真普聯召集人鄭宇碩尋日出席一個論壇後話，佢哋下次開會將會商議加入機制，意味真普聯都要經過篩選至可以加入。至於真普聯加入機制係點，佢話無可奉告。

有指部分金融機構正為「佔領中環」作風險評估同應變部署，白鴿黨何俊仁尋日話，聽聞連投資公司亦有類似部署。但佢重申，若普選方案符合國際標準，「佔中」實可避免，但真普選不能推出，一場「社會爆炸」就會發生，佢希望掌權者可以用一年時間好好冷靜，唔好咁驚成日都以為泛民好有興趣選特首。不過，鄭宇碩一聽到「佔中」就劃清界線，話真普聯對佔中嘅立場係不參與策劃但支持。