政壇：熨斗大王好食好住留工人

有「熨斗大王」之稱嘅東保集團主席陳鑑光喺內地設廠，有時喺內地長假之後，工人放完假之後都會一去不返，面對呢個棘手問題，佢諗到條好橋留住工人。

陳鑑光話工人嘅要求高咗好多，要挽留人手就要從食堂同宿舍質素着手。以前工人買餸自己煮，依家唔單止要有飯堂，食物仲要好味；以前有熱水用已經好滿意，依家要全天候熱水供應。

唔單止食住要好，佢話仲要提供埋全面康樂設施，請舞蹈專家開班教跳舞，又要保證有高速上網，仲要劃分出一條俗稱「綠道」嘅單車路，方便工人踩單車做運動。佢嘆謂，經營成本因此大增五成，但都冇符，皆因做廠嘅致勝之道，就係起貨效率比人快、產品質素比人好，唯今之計就只有投其所好，冀望增加員工歸屬感，提升工作效率。