政壇：范國威揭曝光新人王後台

新民主同盟范國威尋日借立法會運作近半年為由，統計十三位直選新丁舊年十月至今嘅見報率。根據佢調查發現，新民黨副主席田北辰依然以一千二百幾條新聞遙遙領先，排第二同第三嘅分別係見報八百幾次嘅范國威同七百五十幾次嘅人民力量「慢必」陳志全，而建仔新界西兩位新丁梁志祥同陳恒鑌就齊齊包尾。

除用見報率高低將十三位新丁排等級，范國威仲抽絲剝繭研究田二少成為曝光王嘅原因，佢話睇番首五位曝光新人王喺兩份傳統左派報章嘅見報次數，發現田二少嘅見報率竟多過泛民議員足足三倍，於是就暗寸對方之所以成為曝光新人王，都係靠左派報章所賜。

范國威總結話，左派報章對田二少寵愛有加，令田二少亦用「三權分立亦屬對抗」等連成龍都望塵莫及嘅言論回敬對方。其實立會唔係畀議員博出鏡爭見報嘅地方，況且曝光率高唔代表議員好勤力，見報率少亦唔代表有人偷懶唔做嘢，強行製作排行榜又何必呢？