工潮欲罷不能 高官齊齊潛水

車公籤文話蛇年香港凡事不利，宜慎小人，唔通真係咁靈？「佔領中環」政治核彈未發射，「佔領碼頭」工潮先爆發，咁搞法，香港想有運行都幾難！

乜嘢係佔領碼頭？咪係葵涌碼頭工潮囉。風波已經擾攘超過一個星期，勞資雙方依然僵持不下，工人繼續喺碼頭外面紮營抗戰，資方繼續企硬寸步不讓，兩邊大纜都扯唔埋，都唔知點收科！

最大鑊嘅係，好事不出門，醜事傳千里，工潮風波愈演愈烈，外國傳媒紛紛報道，香港嘅聲譽已經蒙污。《亞洲華爾街日報》仲報道話，有台灣大型航運公司為咗避開工潮，索性考慮將部分集裝箱停靠其他港口，你都咪話唔濕滯。所以咯喎，付貨人委員會拉響警號，指內地「五一」長假期將至，如果工潮短期內唔解決，本港貨運業承受嘅衝擊無法想像o架！

話時話，邊個唔知碼頭工潮會影響香港經濟吖，邊個唔想工潮早日結束吖，有人居中斡旋、排難解紛至得o架。係喎，有個人渾渾噩噩懵懵閉閉，可能真係唔知形勢幾咁惡劣喎。邊個？咪就係勞工處處長卓永興囉。大家睇下，工潮風波持續咁耐，卓永興影都未見過，只係派勞工處職員去碼頭吹風，自己就一直玩潛水，好似完全唔關佢事咁款，一睇就知佢縮骨卸膊，關人個關啦。

你話班高官幾混帳吖，出面鬧緊工潮，搞到水深火熱，滿城風雨，佢哋就全程匿埋，翹埋雙手等出糧，乜都唔使做，乜都唔上心，政府請佢哋返嚟都唔知做乜！係人都知，每次發生大型工潮，勞資角力錯綜複雜，唔係一句船到橋頭自然直就搞得掂，而係需要政府高層介入，居中調停，先至會有轉機。嗱，今次工潮擾攘咁耐嘞，當局做過啲乜吖？勞福局局長張建宗及勞工處處長卓永興去咗邊吖？

不過話時話，港產官僚縮骨卸膊，有事即閃，都唔係第一次咯。舊年本港一名男童證實染上禽流感，當時主管醫療嘅食衞局局長周一嶽同衞生署署長林秉恩居然又係唔見影，原來雙雙去咗南丫島食海鮮，完全唔理疫症。仲有吖，早年一批香港旅客被迫滯留泰國機場，港府更加擺空城計，高層集體失蹤，成為國際笑話。

一句講晒，碼頭工潮損港譽，高官潛水太反智。為咗逼卓永興蒲頭，大家不如登番則尋人啟事，內容可以咁寫：「親愛的永興，碼頭公司及工人很想見你一面，見字請速往葵涌碼頭相聚，不見不散！」