SUN搞作:打橫嚟講:妖音邪惡集團

漢奸就話聽得多,家陣連「廣府話奸」都出埋,某個自詡為正音大師的壞鬼中文系博士,多年來在大學高等院校以宋代《廣韻》之陳年中州音為準通過香港電台大放病毒。不過講到為害最深的,一定係佢叻到將教育當局洗腦,更將「病毒音」引入中學公開考試,欺騙廣大莘莘學子,簡直就係罪大惡極,如果孫中山先生今天才參加會考,以他一腔中山口音,早已被革掉了。

當然,如果有個小朋友將「白之戀人」讀成「白癡戀人」,咁就當然抵打,問題係,據呢班所謂「抗病毒音」人士調查發現,「正音」也者,「時間」要讀「時奸」;「機構」要讀「機救」;「棟樑」要讀「凍樑」;「夭折」要讀「繞折」;「莖葉」要讀「衡葉」,唔係講笑,正常人真係聽到耳都側。

如果跟足妖人發妖音,堂堂一個查理斯王子,要變成為鎮守灶頭的「廚君」;CID破門而入「搜屋」竟然變拆遷人員「收屋」。不過無傷大雅,那就算了吧,最弊嘅係,城中有位姓韋的有識之士,亦被指其姓氏「韋」應讀「圍」音,即是說人家幾十年來數典忘祖,一直讀錯自己的姓氏!你話係咪激到吐血吖?

既然大博士咁巴閉,好希望佢有朝能夠搵到一本絕世古書,證明「曾蔭權」可以讀成「真陰功」,又或者原來「嶽」字之乜州音原來咁啱得咁蹺係「鑊」,還周一嶽一個清白,以後可以名正言順自稱「周一鑊」,咁我就話你個白頭佬好嘢!

彭志銘

次文化考古學家,對城中潮語有深入研究,博徵博引,廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps