SUN搞作：Sun官場現形記：H7N9，強國未驚過！

H7N9喺強國爆發，香港小市民梗係驚驚喇。不過上面班膠官並無吸取10年前沙士嘅教訓，開記者會交代事件嗰陣懶係淡定，有無死人都好似唔關佢哋事，通報慢條斯理，仲大言炎炎，李衞邊問邊聽，真係火都嚟埋……

李衞︰當局擔唔擔心H7N9會大規模爆發？

膠官︰唔擔心，只係一件小事。

李衞︰但已經有人因病喪生……

膠官︰天佑強國，強國死亡人數永遠唔會超過「37」，有咩好怕？

李衞︰有當地市民不滿「應急」方案，話連點防範都唔教喎！

膠官︰我哋一向都有訓練國民嘅免疫力。

李衞︰吓？免疫力都有得訓練？

膠官︰點解無？強國人有咩黑心食品未食過，連地溝油都敢用，大菌食細菌，H7N9算甚麼？

李衞︰就當強國人「訓練」有素，但其他地方嘅人就無喇，咁點解仲要事隔二十日先公報事件？

膠官︰其實當中係有少少誤會……

李衞︰咩誤會呢？

膠官︰新型病毒，有官員唔小心聽錯「辛刑」，以為有人要為辛苦刑期上訴，又要顛覆國家，就將件事轉介畀維穩部門，左轉介右轉介，所以咁遲先公布。

李衞︰@#$%%^^&&@#$