政壇：政商定格：潘治忠承父志服務大眾

博愛醫院董事局早前舉行慈善聚餐，主席潘德明夫婦、身為總理嘅妹妹潘美蘭同公子Raphael潘治忠齊現身。博愛喺呢個月換屆，行將卸任嘅潘德明笑言心情複雜，皆因過去一年身負重任壓力大，但過程多采多姿，留低唔少美好回憶。Raphael透露爸爸落咗莊之後，自己仍會留守博愛，繼續為慈善出力，目標係做到主席，延續爸爸服務大眾嘅宏願喎！

Raphael話加入博愛大家庭後，學識唔少危機應變嘅技巧，仲結識到各行各業嘅好友，對工作好有幫助。佢話最近回巢打理家族地產生意，面對政府近日推出嚴招遏抑樓市炒風，佢坦言樓市交投係淡靜咗，但前景依然樂觀，事關市民始終對房屋需求大，政府施政尚有調整空間，相信樓市唔會大跌。