政壇：老婆中山買樓高永文唔過問

政府連番推出樓市辣招後，樓市進入寒冬期。根據最新嘅行會成員利益申報冊顯示，食物及衞生局局長高永文似乎都唔睇好本地樓市，佢太太江孟儀二月尾就買咗中山市一個住宅單位，決定轉戰內地市場。

我哋問過高永文係咪睇好內地樓市，佢就好老實話今次決定全由太太話事，自己尊重對方決定，所以冇過問間屋幾大、買咗幾多錢，詳情都係太太先知，自己只係跟足規矩向行會作申報。我哋睇番政府推出辣招時間，財爺鬍鬚曾喺二月二十二號決定推出「雙倍印花稅」，樓市即時步入冰封狀態，高永文喺二月二十七號就通知行會秘書處有新申報，話太太喺中山市買咗個住宅單位，似乎高太對市場非常敏感，見到風吹草動即時改變策略，好有投資眼光。

老婆買樓咁大件事，老公冇理由唔知啩，動輒幾百萬喎。不過睇番啲物業擁有權，佢一向畀老婆話事，例如名下五個物業中只得一個九龍城區連車位物業係佢個人擁有，另外一個港島東物業就係同老婆共同持有，其餘三間物業都係老婆擁有。