政壇：高佬賢遊吉澳歎風味菜

喺啱啱過去嘅復活節，立法會新界西議員建仔Ben陳恒鑌同漁農界「高佬賢」何俊賢，喺西貢黃石碼頭搭船出海，沿途欣賞赤洲同黃竹角咀瑰麗獨特嘅岩石形態，之後再到吉澳、鴨洲呢兩個生態旅遊勝地上岸遊覽。業界選民散遍全港嘅高佬賢不時周圍拜訪選民，佢話平時都可以用私家車代步，但如果目的地係人迹罕至嘅島嶼，就要搵漁民朋友用快艇載佢一程，所以現時欠落唔少「人情債」。

去到吉澳呢個極富漁村風味嘅小島，高佬賢指明要一嘗當地傳統特產鹹魚仔、手打墨魚丸同客家炆豬肉，豎起手指公大讚好味。佢話漁民性格率直豪放，通常見面嘅第一句話就係：「食咗飯未？一齊去食啦！」所以「食飯」就幾乎成為佢會見選民嘅指定動作。

雖然高佬賢經常要同漁民食飯，但佢就話自己「食極唔肥」，入立會咁耐都係重咗一公斤咁大把。佢引述前輩話，業界除咗憑年紀睇一個人嘅資歷外，腰圍都係佢哋嘅參考條件之一，正因為咁，腰圍「豐厚」嘅前漁農界代表黃容根被公認為資歷極深，而高佬賢就謙稱有排都未追得上前輩。