政壇:藍列群被誤會秘密延任
政府舊年十月以非公務員合約方式,委聘房屋署前助理署長藍列群出任政務司司長高級特別助理,被泛民質疑係巧立名目明益「梁粉」。藍列群任期原定喺上月三十一日完結,但有心人前日查看政府電話簿,發現佢仍榜上有名,旋即有人揣測佢係咪再獲當局秘密延任,但原來只係一場誤會,事實就係事實,不實就係不實。
前日喺復活節假結束後、亦係四月首個工作日,有人透過政府網頁內嘅電話簿搜尋藍列群個名,結果顯示佢仲喺政務司司長辦公室做緊。我哋立即透過新聞處查詢,對方查咗一輪後,回覆話藍列群確實已因合約期屆滿而離開政府,只係政府電話簿未及時更新啫。我哋今日再查看政府電話簿,果然再搵唔到藍列群個名,都算幾有效率。
中央政策組去年九月委任出版業人士關永圻出任中策組全職顧問,任期同樣於上月三十一日屆滿,我哋亦有查看中策組網頁同政府電話簿,發現已經唔見咗佢個名。有傳中策組正諗緊計再次聘用佢,但未必過到立法會嗰關。
藍列群被疑獲秘密延任,結果證實是一場誤會。(資料圖片)