政壇：林健鋒買紅酒蝕清

香港有唔少人喺世界各地搜購紅酒，除咗買嚟自己品嘗之外，仲可以保值，珍藏嘅酒升值又快，喺有市有價嘅情況下，隨時可以賺筆勁嘅。

全國政協常委唐唐早前委託拍賣行出售珍藏紅酒，點知有人質疑極少部分藏品係假貨，唐唐事後發表聲明嚴詞否認，事件至告一段落。但唐唐嘅好友、立法會總商會代表林健鋒就冇咁好彩嘞，佢自爆喺十幾年前曾因為買紅酒出事。因乜事呢？原因係代理商疑出現財政問題，粗略估計，損失咗約幾十萬元。

肥亨逃過一劫

Jeffrey憶述，當年紅酒入境要納稅，所以佢曾經同朋友一齊購入紅酒，並儲存喺海外地方，咁做都係因為可以慳番存放紅酒嘅地方同稅項。但隔一段時間後，當佢要求紅酒代理商將已購入嘅紅酒運到香港時，嗰個代理人就諸多藉口咁推搪，事後佢哋先知有人疑出現財政困難，一早已經將存放嘅紅酒賣出套現。咪就係咁，渣都冇囉！

除咗佢之外，據聞當時有好多政商界中人，包括有專業背景嘅醫生、律師，甚至係銀行家都係受害者，大部分人最後都血本無歸，損失七、八成本金，即係約幾十萬元，如果啲酒擺到依家，就唔止呢個價錢喇。

雖然有咁多受害者，但當時亦有人逃過一劫，佢就係財經事務及庫務局前局長馬時亨。話說肥亨喺做局長前夕，購入嘅紅酒一係賣晒，一係一早運晒返嚟香港，所以冇乜損失。