配錯藥知情不報 衞生署有責不負

內地首次發現死亡率勁過沙士嘅變種禽流感H7N9，當局事發近一個月至公布消息，被質疑隱瞞疫情。如果有人慶幸自己生活喺香港，唔使中咗招都唔知發生乜嘢事，好可能係太天真太傻。

港產官僚內地化愈來愈嚴重，敷衍甩漏嘅陋習學到足，話之你十萬火急，一樣闊佬懶理。嗱嗱嗱，醫療事故又嚟喇，今次涉及誤配藥物，萬一有乜冬瓜豆腐，隨時可能搞出人命。

前排有三名病人去粉嶺一間私家診所睇病，獲處方強效降糖尿藥，其中兩人服藥後因為急性血糖過低要送院，另一位好彩仲未食藥。最離譜就係，三位病人從未有過糖尿病史，估計有人擺烏龍。

降糖尿藥點可以亂開o架？專家話，呢啲藥如果誤服會有不良反應，尤其係長者，可能會頭暈、昏迷甚至死亡，都咪話唔大鑊。

香港醫院藥劑師學會懷疑事件涉及醫生配錯藥，擔心受影響市民可能會增加，要求衞生署盡快公布涉事診所名稱，呼籲曾經去過呢間私家診所睇病或者配藥嘅病人，服藥後有乜唔妥要盡快入院。問題係，市民連邊間診所開錯藥都矇查查，萬一有人唔知情繼續服藥，隨時會出事。

衞生署接獲通知後話就話會展開調查，弊在官府辦事從來都係你有你急，佢哋有佢哋拖。署方一拖數日，尋晚至匆匆公布「初步調查結果」，話涉事嘅係西醫李明診所，事故起因係診所嘅血糖機出現讀數錯誤，仲派定心丸話，事件涉及嘅三名病人已經全部聯絡上。

叮！復活節假期之前已獲知會，拖到假期最後一日至公布涉事診所名稱，知情不報，唔通真係官老爺放假大過天，連關乎市民安危嘅大事都要讓路？仲有呀，如果唔係藥劑師學會出於對市民安全負責，提醒大家注意，敦促當局從速做嘢，衞生署班老爺睇怕仲要歎埋假期最後一分鐘，等今日開工都未必拉警報。

再講，家陣只有涉事醫生嘅一面之辭，前前後後到底有幾多病人「被糖尿」，獲配發強效降糖尿藥，根本難以確認，衞生署憑咩咁肯定事件只涉及三位病人？大吉利是講句，如果另外有人中招，呢隻鑊係咪新科署長陳漢儀孭先！

計太一叮話齋，講到大事化小，小事化無，有鑊冚得就冚，卸得就卸，不負責任，草菅人命，港產官僚同內地官員都係天下烏鴉一樣黑，叮！