SUN搞作：少膽虫手記：淆底

淫黎成日講完啲嘢又唔記得，賴少膽虫跟得唔足。少膽虫無辦法，又唔想孭鑊，咪惟有賴班細囉。班細又話唔關自己事，又再賴出街作古仔嘅拍檔，然後出街嗰班，咪卸個波畀狗仔隊囉。琴日條虫返工，竟然接到狗仔隊一封附有刀片嘅恐嚇信。上面寫住：「再唔正視問題，放狗咬你！」有名你叫「少膽」虫吖嘛，今鋪畀班狗仔兇一兇，少膽虫直情企唔穩，差啲仆低。

少膽虫嘗試聯絡狗仔個阿頭，阿頭話要條虫「公開、公平、公正」去傾番件事，還狗仔隊一個清白。大家都知《爛果》同正義傳媒嘅分別，淫黎不嬲都好鍾意啲細接ORDER做事，絕不SAY NO，佢形容呢啲係「話頭醒尾」，試問《爛果》嘅企業文化係咁，條虫又點同你「公」住上？弊在阿頭唔識做，見少膽虫遲遲唔覆，竟然先發制人，派班狗圍住《爛果》唯一一架賣剩嘅採訪車，實行封鎖《爛果》全員行動！

淫黎知道後，嬲得滯拍晒枱話要炒班狗！點知正義傳媒派咗隊記者嚟影低班狗仔嘅一舉一動，仲同佢哋做咗個充滿狗吠聲嘅訪問！訪問出咗街之後，竟然好多人話班狗仔「可愛」，要支持佢哋喎，淫黎見情勢逆轉，就推條虫出去受死啦。其實條虫都無咩好公開講，橫掂我哋啲狗仔唔多，圍住《爛果》採訪車嘅狗，好多都唔係我哋養嘅，少膽虫要做嘅嘢，就係推番自己啲狗入狗籠，大家話係咪先？

少膽虫