政壇：政商定格：陳文綺慧為東華唔夠瞓

為咗扶貧，政府近日頻頻拉「善團」合作，東華主席Viola陳文綺慧又搞「天秀墟」，又搞青年宿舍，挑戰唔少。回望任內一年，文件、慈善晚宴、籌款計劃、拜訪不絕，佢大嘆日睡僅四、五小時，由此學會「榨時間秘技」。

Viola上任冇耐，每日行程多達九至十個。佢笑言每日裙拉褲甩出門，最狼狽嗰次，係一日內撞正「紅白二事」，再加一個典禮。連走三場，惟有帶齊素色、鮮色外套，快速喺車上大變身。除咗應酬多，為免三更半夜回家，佢不時將文件搬返屋企刨，好快屋企就多咗幾座「大山」，行入書房都要繞道而行。所以卸任後，佢有三件事要做，第一係清理「文件海」，第二係不停瞓覺，瞓足半年叉電，第三，係考慮生仔。