政壇：搞搞政：不滿限奶令漏洞 范國威禁區挑機

早前講過嘅立法會韓國考察鴨仔團終於成行，十七位議員尋日齊集機場出發，考察首爾嘅廢物管理經驗，但新民主同盟嘅范國威竟乘機向限奶令挑機，佢入閘後竟然走咗去舖頭買奶粉。

范國威不滿「限奶令」漏洞多多，認為旅客先將兩罐奶粉放入行李辦理登機手續，再喺禁區買多兩罐奶粉帶上機，就可以神不知鬼不覺帶夠四罐奶粉出境。佢尋日喺舖頭問售貨員可以買幾多罐奶粉，售貨員問都冇問佢行李入面有冇奶粉，就話最多可以買兩罐。佢最後用二百零蚊買咗一罐奶粉，仲同埋罐奶粉擺甫士影相，話會向官員反映法例漏洞。佢全程要同罐奶粉一齊搭飛機兼考察，佢話會盡量將罐奶粉轉送畀機上嘅初生BB家庭。

其實呢個鴨仔團仲有好多甩轆嘢，例如白鴿黨涂謹申因「仔細老婆嫩」驚打仗決定退團，公共專業聯盟莫乃光去到機場先發現唔記得帶護照，仲要冇錢喺身，要靠團長Cyd何秀蘭同白鴿黨主席劉慧卿仗義疏財，佢先夠錢飛的返喺中環嘅屋企攞護照，好彩最後有驚無險趕得切上機。除咗畀其他議員笑佢係「烏龍王」之外，阿Cyd仲要佢倍數捐番錢畀正在罷工嘅碼頭工人。