政壇：楊受成捐500萬惠內地長者

英皇集團主席楊受成繼續支持內地老人護養及善終服務，佢上周六應河北省順平縣邀請，出席剛落成嘅「楊受成（中國．順平）關愛老年中心」啟用儀式。楊受成同時以楊受成慈善基金再度捐出五百萬元人民幣，為該中心添置住宿及醫療設施，推動深化關愛老人服務。

啟用禮上，英皇集團董事總經理范敏嫦、英皇娛樂藝人鍾舒漫及關智斌亦專程到場打氣。楊受成致詞時話，對於參與關愛老人服務嘅工作，能夠得到國家認同，感到好光榮同鼓舞。佢希望以自己嘅一點綿力，喚起更多人關注，共同做好國家嘅老年服務。

新落成嘅老人中心位於河北省順平縣，距離北京市約兩小時車程，建築面積一萬五千幾平方米，係兩年前由楊受成慈善基金捐資一千萬人民幣興建，今年初順利竣工，共有六百五十個宿位，專為無依老人提供收容、醫療、復康及臨終關懷「一條龍式」服務。