政壇：政黨職員待遇大不同

現行強制性公積金計劃容許僱主以其供款累算權益，同僱員長期服務金同遣散費對沖，勞工界一直爭取取消有關對沖機制，但爭取勞工權益嘅三大工會，包括職工盟、工聯會同勞聯因資源問題，都採用對沖機制，不過咪以為只有工會「嗌晒救命」，因多個政黨都資源有限，要控制開支免入不敷支。

綜合各方消息指出，以泛民主派為例，佢哋長期缺乏地區資源，亦無穩定收入同「大水喉」支持，助理同職員嘅待遇自不然會稍為遜色，惟有靠誠意搭夠，甚至希望大家都係追求民主嘅同路人，共同向目標進發。

建制派方面，富貴黨畀外間印象係水頭充足，但聽聞早前該黨都要控制開支，難免職員方面「有出有入」，相反建仔方面嘅待遇幾唔錯，除每年按公務員幅度加薪外，大時大節更會有豐富禮品抽獎，聽聞電子產品同茶葉等成為「例牌」抽獎禮物，最名貴嘅連花膠都試過有得抽，絕非其他政黨可以媲美！