政壇：鄭淇德難忘為民工洗耳

醫院管理局前主席「金刀梁」梁智鴻、醫療專業人士協會創會主席Bernard江明熙、副主席鄭淇德幾位名醫尋日入馬場，撐佢哋早前夾份買嘅團體馬「金刀銀鑽」。「金刀銀鑽」個名咁特別，金刀梁解釋，「金刀」代表自己，「銀鑽」係指牙醫。Bernard話啱啱趁住復活節假，帶隊北上義診三天。佢透露，醫專會每年都舉辦義診，前年去過廣西，今次就帶埋一間書院嘅中學生去東莞三日，畀佢哋增廣見識。鄭淇德話內地民工對健康意識好薄弱，乜嘢奇難雜症都有，但係冇錢亦冇時間去醫，蛀牙、爛牙屢見不鮮，有啲內耳發炎、耳膜穿窿都不自知，最難忘係去棉廠義診，驚見民工耳仔塞滿棉花，要為佢哋逐一洗耳。