政壇：傻強難搣強積金污名

提起強積金，相信市民大都好火滾。強積金自二○○○年推出後，到依家已經十幾年，然而「高收費、低回報」一直惹人詬病，強積金回報唔貼近市況，「白供」「見紅」絕非新鮮事。不過，多年來政府同業界仍然愛理不理，改革以龜速進行，其中行政費仍然高踞全球，而負責強積金呢瓣嘅係財經事務及庫務局，局長「傻強」陳家強當然畀人鬧爆喇！據聞現屆政府有雄心壯志，要改善強積金。

銳意加強強積金防禦能力都唔係近排嘅事。話說前年財爺鬍鬚曾提出「史上最廢」嘅財政預算案，當中提出向每個強積金戶口注入六千元，引發大家廣泛討論對強積金嘅憤恨，連預算案撥款都面臨觸礁嘅危機。當年政府內部兵荒馬亂之際，有高官先如夢驚醒，憤言立志要搣甩強積金污名。

做醜人氹Fund佬

好可惜兩年後嘅今日，強積金「高收費、低回報」污名仍在，強積金收費立法封頂仍然只係聞樓梯響，喺輿論壓力近日平均收費先終於下滑至百分之一點七二水平。

到咗今時今日，據聞有政府高層亦認為收費應封頂同埋降低收費，不過身為「刀手」嘅前線執行部門對減費建議有保留。梗係啦，刀手們既要做醜人氹掂一班「Fund佬」（基金經理）乖乖就範減收費，而立法為收費封頂亦意味着長遠增加執行部門嘅監管工作，點睇都係要增加執行部門嘅工作量，睇嚟要搣甩強積金嘅污名，前路並唔平坦。講到底，就要睇傻強有冇決心做呢件事嘞！