退保金額可商量 莫讓長者鬥命長

喺香港，老人貧窮已經成為老掉牙嘅社會問題，喺港府長期漠視之下，清貧長者高達二十九萬人，貧窮率三成幾，即係每三個老人家就有一個捉襟見肘。更令人擔心嘅係，本港老人貧窮問題似足老人骨質疏鬆症一樣，隨住年月增長而不斷惡化，如果情況唔改善，老人街頭執紙皮分分鐘成為香港最具特色市貌。

有乜辦法解決呢？制訂一個可以畀長者安享晚年嘅全民退休保障制度囉。剛剛接受港府委託牽頭研究全民退保嘅港大教授周永新係咁講嘅，退保金額定喺四千元係合適水平，能夠畀一個單身綜援長者應付日常生活開支同交租，如果以全港有一百萬名六十五歲以上人士計算，政府每年開支大約四百八十億元左右。

周永新仲話，退保制度涉及龐大開支，透過增加利得稅同動用政府儲備作種籽基金都未必可行，必須由政府、僱主同僱員三方共同供款承擔，要取得共識唔容易，所以相信今屆政府推行嘅可能性甚低。

聽完周教授咁講，大家有乜感想？太一叮就悲喜交集嘞。喜嘅係為各位貧困長者高興，等全民退保等到頭髮都白晒，家陣終於等到有啲眉目。四千元雖然未必可以令老人家晚年無憂，不過能夠維持基本溫飽，總算有望過番一個有尊嚴嘅生活，唔使好似依家咁日日驚住寅吃卯糧，臨老唔過得世吖。

有數得計，每年開支四百八十億元表面睇似乎好龐大，但實際負擔有限，家陣長者生果金每年都要唔少錢啦，仲未計長者綜援同租金津貼，如果改行全民退保，一出一入其實唔差得幾多o架咋。尤其係庫房年年水浸，財政儲備高達七千三百幾億元，就算要額外負擔多少少，對港府嚟講都係九牛一毛啫。如果咁都一毛不拔托手o架，寧願睇住老人家繼續捱窮，咁就唔止係孤寒，更加係冷血！

嗱，呢樣正係太一叮感到悲從中來嘅原因嘞。一日都係港產官僚做慣不孝子，令到老人貧窮問題積重難返。按照周教授嘅講法，家陣就算政府真係接受四千元金額水平，未來幾年都難以成事，唔少老人家晚景淒涼生活艱苦，到全民退保落實之時，都唔知有幾多公公婆婆等唔到咯。

咁講啦，退保金額可商量，莫讓長者鬥命長。各位港產官僚，做咗咁多年不孝子都夠啦，快啲洗心革面，盡快推行全民退保。如果唔係，萬一逼到老人家撐拐杖「佔領中環」，實變國際笑話，叮！