SUN搞作：打橫嚟講：愛國愛港特首的必然條件

中國大陸小官，就香港民眾殷求普選特首的問題上，再三反覆強調做「新特首」的條件，係要「愛國愛港」，真係聽到耳生繭，骨都痹，煩死狗，悶出鳥來，毫無新意。

老老實實，作為咱們本地正宗香港人，點會想選個禍國害港的廢、殘、賤的特首吖？大家心目中的理想特首，係唔講大話、有誠信、一心維護香港人福祉、保衞世界公認的普世核心價值，例如：人權、民主、法制、公義、平等……並要弘揚人類基本道德關懷……而最好的愛國者，係敢於在專權獨裁者面前勇於批判，諍言相告，而非同流合污，扮狗乞憐！

有專職處理香港事宜的中國小官，近日，除做人肉錄音機播「愛國愛港」、「愛國愛港」之外，多加一項條款，就是「不可對抗中央」。唉！他們眼中的香港「異見分子」，全是「反中亂港」之輩，這真大錯特錯，可能這群小九官身旁小人眾多，只為自身利益而散放讒言，令到佢哋偏聽而收錯風。嗱！以前中聯辦同港澳辦的駐港官員就因誤信讒言，做錯判斷，被中央譴責啦！

誰是愛國？誰是愛港？好簡單，凡做對國家同對香港有利的，就是愛國愛港。再退一步，佢哋唔貪污、唔用人唯親、唔私相授受、唔謊報虛情呃中央、唔不理香港人死活、唔僭建、唔移民美加英澳……我哋香港人都已當佢係個唔錯的「正常」好官！當然，香港特首首要的是在重要時刻，誓必站在港人這一邊的一個人，而非傀儡。

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府