SUN搞作：Sun官場現形記：豬一樣的敵人

成班（自稱）民主友最近嘅計劃，講到沸沸揚揚。李衞收到風，一班建港聯盟嘅鄉親父老，為咗安慰可憐嘅小淋淨，齊集門常開分析戰局，實行同小淋淨講：「唔使驚，阿媽喺大廳。」

陸陰機：班人鬼咁激進……計我話學我玩吓手機，輕輕鬆鬆又一day咪算囉，學咩人計劃霸地，然後賴死唔走吖？

廉恥主席：做人梗係要有啲理想o架啦，呢招叫蠱惑的槍，畀少少甜頭班友，等佢哋以為自己推進緊歷史洪流，然後請四方西同隻白鴿去西環飲吓咖啡，革命完成，就係我哋嘅天下。

陸陰機：主席你所言甚是喎！原來你同平等主席一樣，都有自己一套嘅！

廉恥主席：（似笑非笑）用王家衞嘅電影語言去分析，你似乎連「自己」都未見到喎！

淋淨：主席，我個位都未坐暖，一約師姐食飯就畀人改圖，依家連人哋買竹唔畀錢都想嚟入我數。你條橋係咪真係掂？

廉恥主席：你定啦！兵家有云，寧要狼一樣的敵人，不要豬一樣的隊友。我毛都未生齊就出嚟撈，有咩天仙局我唔識？依家班友，畀鬼佬縱慣，全部都係港式金毛尋回犬－毫無憂患意識！

淋淨：唔係喎，依家講緊要佢哋支持同強國同一陣線嘅公僕喎！你睇半年前單嘢，班友坐足喺我樓下成個月，一聽到個紅字就擘晒面，搞到我瘦咗十磅有多！你哋信唔信得過o架？

廉恥主席：師妹，我問你，班友係咪理性集會最後和平散去回家持續抗爭吖？依家個PROJECT咪又係明禁暗推！

淋淨：又係喎……

廉恥主席：所以，退一步海闊天空，等班人自覺好有成功感，變到手無縛雞之力，然後我哋就好似過津貼咁－乘虛而入！

陸陰機：哈哈！所謂別人笑我開PARTY，我笑他人無推薦，機會係留畀真正有「準備」嘅人o架，等佢哋仲以為副局好易上！